खड्कनारायण निरौला जस्तै बारबोटे र नजिकका गाविसका बासिन्दा गुणस्तर र परिमाण दुवै बढाउने प्रयास गर्दा पनि अदुवा, अलैँची र अम्रिसोको उही न्यून मूल्यबाट थाकेका थिए। सिलिगुडी र नक्सलबाडीका व्यापारीले मूल्य तोक्थे र बासिन्दासँग गुजारा चलाउने अन्य विकल्प र मोलमोलाइको अवसर नभएकाले तोकिएको मूल्य स्वीकार्नुपर्थ्यो। यो समस्या समाधान गर्न एन्सावले इलाम उद्योग वाणिज्य सङ्घसँग मिलेर जनताको हैरानी हटाउन बजार सूचना सेवा सुरु गर्यो। सेवाले सिलिगुडी, नक्सलबाडी, धुलाबारी, बिर्तामोड र जिल्लाका अन्य प्रमुख व्यापार केन्द्रमा बिक्री हुने उत्पादनको बजार सूचना उपलब्ध गरायो। त्यसपछि समुदायले मूल्य बढाउन व्यापारीसँग बढी मोलमोलाइ गर्न थाले। निरौला भन्छन्, “मूल्य सूचनाले मेरो जीवनमा परिवर्तन ल्याएको छ।” सूचना सेवाले जनतालाई बढी आर्थिक लाभ दिएको छ। तर मोलमोलाइ क्षमता बढेकाले मूल्यमाथिको एकाधिकार घटेकोमा केही व्यापारी असन्तुष्ट थिए।
व्यापारीलाई सहमत गराउनु चुनौती थियो। एनटीएफपी उत्पादन र बजारीकरणमा व्यापारी र सङ्कलक दुवैलाई लाभ हुने जिम्मेवारी, उत्तरदायित्व र दिगोपनको आवश्यकता दिनदिनै व्यापारीलाई सम्झाइयो। अहिले अदुवा, अलैँची र अम्रिसोका व्यापारी श्री बालभद्र आचार्य भन्छन्, “मूल्य सूचनाले व्यापारी र सङ्कलकबीच आपसी बुझाइ बढाएको छ। अहिले म सङ्कलकलाई ढुवानी लागतबारे सहमत गराउन सक्छु र उनीहरू पाइरहेको मूल्यमा सन्तुष्ट छन्। मप्रति विश्वास गर्ने सङ्कलक बढ्दै जाँदा थप मानिसले मलाई उत्पादन बेच्छन्। त्यसैले बजार सूचना प्रसारअघिको तुलनामा मसँग अहिले बढी व्यवसाय छ।” अहिले समुदायले आफ्ना उत्पादनको राम्रो मूल्य पाइरहेका छन् र व्यवसायीहरू जिम्मेवार व्यवसायतर्फ अघि बढ्दै छन्।
