बझाङका जनकबहादुर सिंह अहिले एन्सावको प्राविधिक र आर्थिक सहयोगमा सामुदायिक वन उपभोक्ता समूहको स्वामित्वमा स्थापित मालिका ह्यान्ड मेड पेपर प्रा. लि. मा काम गर्छन्। मालिका ह्यान्ड मेड पेपर प्रा. लि. स्थापना हुनुअघि सिंहले पैसा कमाउन बाहिर जानुपर्थ्यो, तर अहिले उनी आफ्नै गाउँमा बस्न सक्छन्। उनी अहिलेको जीवन मन पराउँछन् — प्राकृतिक स्रोत संरक्षण गर्दै त्यसबाट कमाइ गर्ने। उनी भन्छन्, “मैले उद्यमबाट कमाएको आम्दानीबाट केही रकम काम खोज्न बाहिर जानेहरूलाई ऋण दिएर पनि मानिसलाई सहयोग गरिरहेको छु।” “अहिलेसम्म कति ऋण दिनुभयो?” भन्ने प्रश्नमा उनले “जम्मा २० हजार रुपैयाँजति” जवाफ दिए। सिंह जस्तै धेरै पुरुष र महिलासँग यस्तै कथा छन्। अहिलेसम्म यो उद्यमले क्षेत्रका ५० भन्दा बढी मानिसलाई रोजगारी दिएको छ।
