दार्चुला र बैतडीमा गैरकाष्ठ वन पैदावारको व्यापार

एक व्यापार सर्वेक्षणले आर्थिक वर्ष २००१/२००२ मा दार्चुला र बैतडी जिल्लामा ३५० मेट्रिक टन गैरकाष्ठ वन पैदावार सङ्कलन र व्यापार भएको देखाएको छ। एन्सावले अध्ययन गरिएका जिल्लामा गैरकाष्ठ वन पैदावारको उपलब्धता, सङ्कलन, बजारीकरण र व्यवस्थापनको अवस्था पत्ता लगाउन सन् २००३ को मेमा सर्वेक्षण गरेको थियो। सो अवधिमा दार्चुला र बैतडीमा गैरकाष्ठ वन पैदावार सङ्कलन र व्यापारको परिमाण क्रमशः १३० मेट्रिक टन र २२० मेट्रिक टन थियो। त्यसैगरी, दार्चुला र बैतडी जिल्लाबाट क्रमशः ३७ र २९ गैरकाष्ठ वन पैदावारको व्यापार हुन्छ, जसमध्ये तेजपात (Cinnamomum zeylanicum), रीठा (Sapindus mukorossi), पाखनभेद (Bergenia ciliate) र झ्याउ (Parmelia nepalensis) चार प्रजातिले कुल व्यापारको ८५% ओगट्छन्। दार्चुलामा यार्सागुम्बा (Cordyceps sinensis) र गुच्ची च्याउ (Morchella conica) दुई उच्च मूल्यका गैरकाष्ठ वन पैदावार हुन् भने बैतडीमा गुच्ची च्याउ (Morchella conica)।