“दिगो व्यापारमार्फत हिमाली वनस्पति तथा च्याउको संरक्षणको विस्तार” परियोजनाको सुरुवात कार्यशाला एन्साबले आयोजना गर्यो
२०२४ अगस्ट ७
काठमाडौं, अगस्ट ७ – एन्साब र ट्राफिकले २०२४ अगस्ट ७ मा नेपालको काठमाडौंमा “दिगो व्यापारमार्फत हिमाली वनस्पति तथा च्याउको संरक्षणको विस्तार” परियोजनाको सुरुवात कार्यशाला संयुक्त रूपमा आयोजना गरे।
कार्यशालाको मुख्य उद्देश्य परियोजनाको सिंहावलोकन प्रस्तुत गर्नु र प्रमुख सरोकारवालाको प्रतिक्रिया सङ्कलन गर्नु थियो। कार्यशालामा पश्चिमी हिमालय क्षेत्रका उच्च मूल्य/संरक्षण प्राथमिकता प्राप्त गैरकाष्ठ वन पैदावारको संरक्षण र दिगो उपयोगसम्बन्धी एन्साब र ट्राफिकका विगतका हस्तक्षेप र यो नयाँ पहल अघिल्ला दुई परियोजनाका सफलता र उपलब्धिमा कसरी आधारित छ भन्ने कुरा साझा गरियो। कार्यशालामा नेपालको वन तथा वातावरण मन्त्रालयका सचिव, वनस्पति स्रोत विभाग र वन अनुसन्धान तथा तालिम केन्द्रका महानिर्देशकहरू तथा विभिन्न सरकारी कार्यालय, नागरिक समाज संस्था, द्विपक्षीय र बहुपक्षीय निकाय, निजी क्षेत्र, सङ्घसंस्था र विश्वविद्यालयका प्रतिनिधिसहित करिब ७० जना सहभागी थिए।
दिगो व्यवस्थापन, पहिचानयोग्य र न्यायोचित व्यापारमार्फत हिमाली क्षेत्रका उच्च मूल्यका प्राथमिकताप्राप्त औषधीय वनस्पतिको संरक्षण गर्ने परियोजनाको लक्ष्यले कार्यशालाका सहभागीबाट सकारात्मक प्रतिक्रिया पायो। सहभागीहरूले यो दृष्टिकोणको प्रशंसा गर्दै परियोजना सान्दर्भिक र राम्रोसँग डिजाइन गरिएको भनी टिप्पणी गरे।
बेलायत सरकारको डार्विन इनिसिएटिभद्वारा आर्थिक सहयोग प्राप्त यो परियोजना नेपालमा सामुदायिक वन उपभोक्ता महासङ्घ नेपाल; फेयरवाइल्ड फाउन्डेसन; कोपेनहेगन विश्वविद्यालय; त्रिभुवन विश्वविद्यालय; अक्सफोर्ड विश्वविद्यालय; र डब्लूडब्लूएफ–इन्डियासँगको साझेदारीमा एन्साब र ट्राफिक इन्टरनेसनलले कार्यान्वयन गरिरहेका छन्, साथै केही परियोजना गतिविधि क्षेत्रीय तहमा पनि योजना गरिएका छन्।
नेपालको वन तथा वातावरण मन्त्रालय; नेपाल हर्ब्स एण्ड हर्बल प्रोडक्ट्स एसोसिएसन (नेह्पा); चाइना एसोसिएसन अफ ट्रेडिसनल चाइनिज मेडिसिन (सीएटीसीएम); चाइना स्ट्यान्डर्ड कन्फर्मिटी एसेसमेन्ट कम्पनी लिमिटेड (सीएससीए); र टेरा हिमालय प्रा. लि. परियोजनाका सहकार्यकर्ता हुन्।