एन्सावले नीति निर्माताहरूको स्थलगत भ्रमण आयोजना गर्यो
काठमाडौँ, नेपाल – नीति निर्माण प्रक्रियामा महत्त्वपूर्ण भूमिका खेल्ने नीति निर्माता तथा अन्य सरोकारवालाहरूको टोलीका लागि एन्सावले दुई दिने अध्ययन भ्रमण आयोजना गर्यो। सेप्टेम्बर २०–२१, २०१० मा आयोजित भ्रमणमा दोलखा र सिन्धुपाल्चोक जिल्लाका दुई सामुदायिक वन उपभोक्ता समूह (भित्तेरी सामुदायिक वन उपभोक्ता समूह, थाङसा देउराली सामुदायिक वन उपभोक्ता समूह), एक उपसमूह (गुफाचापे उपसमूह) र समुदायद्वारा व्यवस्थित चार वनमा आधारित उद्यम (देवढुङ्गा बहुउद्देश्यीय सहकारी, भीमेश्वर हस्तनिर्मित कागज उद्यम, सिक्रे सुगन्धकोकिला आसवन उद्यम र अत्तरपुर जैविक ब्रिकेट उद्यम) को अवलोकन गरियो। बुद्धभीमसेन सामुदायिक वन उपभोक्ता समूहका सदस्यहरूले कार्बन मापनको प्रदर्शन पनि गरे। वन तथा प्राकृतिक स्रोत व्यवस्थापन क्षेत्रमा कार्यरत पत्रकार तथा विभिन्न सरकारी, गैरसरकारी र अन्तरसरकारी संस्थाका कर्मचारीसहित २४ जना भ्रमणमा सहभागी भए।
भ्रमणले असल सामुदायिक वनले गरिबमैत्री उद्यम विकास, मूल्य शृङ्खला प्रवर्द्धन, स्थानीय क्षमता अभिवृद्धि र जलवायु परिवर्तनको सन्दर्भमा अवसर सिर्जनामा के गर्न सक्छ भन्ने देखायो। वन व्यवस्थापनको योजना तर्जुमादेखि कार्यान्वयनसम्म गरिब र महिलाको संलग्नता पनि भ्रमणका क्रममा अवलोकन गरियो। स्थलगत भ्रमणका क्रममा सहभागीहरूले समुदायमा आधारित उद्यमका अधिकांश लागत र आम्दानी (जैविक ब्रिकेट र सुगन्धकोकिला आसवन उद्यममा त ८० प्रतिशतभन्दा बढी) सिधै समुदायका सदस्यसम्म पुगेको मूल्याङ्कन गरे। साथै, रेड र एफएससी प्रमाणीकरण जस्ता नयाँ अवधारणासँगै सामुदायिक वन, उद्यम र तिनका उत्पादनका अवसरबारे पनि सहभागीहरूले अवलोकन गरे। सहभागीहरूले स्थलगत भ्रमणमा सक्रिय सहभागिता जनाए, अनुभव आदानप्रदान गरे, केही सुझाव दिए र सम्बन्धित संस्थाको अडान साझा गरे; यसरी भ्रमणले सहभागीहरूको अपेक्षा अनुसार अधिकांश उद्देश्य पूरा गरेको विश्वास गरियो।